Ediziun actuala
|
Editorial
da Jasmin Epp I na funcziuna betg senza
Eri anc mintga quart che s’engaschava l’onn 2000 per lavurs voluntaras, èsi mumentan, tenor la gasetta “20 Minuten” dals 8 d’avrigl 2010, in zic dapli che 20% da la populaziun svizra. La recessiun da l’onn passà ha chaschunà che blers umans considereschan la situaziun d’in auter punct da vista. «Gist en temps da discussiuns da bonis ed economia intscherta vulan blers metter in cuntrapunct e sa laschan en sin in engaschi voluntar», di Elisabeth Fischer, commembra da l’organisaziun tetgala dals posts da mediaziun e spezialisada per lavur voluntara. Igl è in fatg ch’igl è fitg grev da chattar persunas ch’èn prontas da prestar engaschi voluntar. Ma gist quella lavur porta en ca. 320 milliardas francs, quai che è 60% dal product naziunal brut (PNB). Tenor Andreas Bircher dal forum freiwilligenarbeit.ch na funcziunass nossa societad dentant betg senza persunas che vulan prestar in engaschi sin basa voluntara. Uschia è la dumonda: Co san persunas motivadas s’engaschar a basa voluntara? Las scriventas ed ils scrivents da las PUNTS èn ids a la tschertga da gist talas persunas. Ils motivs e l’engaschi èn differents, saja quai donaziuns da sang, servetsch voluntar en pajais da crisa u la midada dal cumportament per proteger noss ambient. Segir è dentant che, malgrà ch’ins na gudogna nagut, il resultat da l’engaschi è merit avunda. En quai senn giavischa il team da PUNTS bun divertiment cun la lectura. E tgi sa, forsa animeschan quests texts in u l’auter da prestar engaschi voluntar.
 |