Istorgia ed avegnir da PUNTS

PUNTS è l’unica gasetta da giuventetgna rumantscha dal mund. Ma PUNTS è era stada l’emprima gasetta surregiunala rumantscha ed ha gì gia al cumenzament l’intenziun da promover il contact e la chapientscha tranter ils giuvenils rumantschs. Entras la fusiun da las gasettas da giuventetgna «Talina» ed «Igl Zundrign» l’onn 1994 han ils giuvenils fatg in pass istoric en il moviment da la Rumantschia.

Gia dapi varga 15 onns dat PUNTS la chaschun da leger ina gasetta da giuventetgna rumantscha a numerus giuvens e giuvnas. Ella furma ina part impurtanta dal mantegniment da la lingua rumantscha. PUNTS dat dentant era la chaschun a giuvenils da far lur emprims experiments schurnalistics e da realisar projects naschids or dad ideas innovativas, sco per exempel la cassetta ed ils differents numers spezials.

Infos en curt

Cumenzament: matg 1994

Regularitad: 4 giadas l'onn

Paginas: 16 - 20 paginas

Gener: gasetta da giuventetgna

Lingua/idioms: sursilvan, sutsilvan, surmiran, vallader, puter, rumantsch grischun

Lecturs: ca. 500

Public: Persunas giuvnas e restadas giuvnas che legian gugent rumantsch e che s'interessan per il linguatg e la cultura rumantscha.

Team: 3 redacturas, 2 layoutists, 1 secretari, 10 redacturs libers

Editura: GiuRu (Giuventetgna Rumantscha)

Pretsch: CHF 45.00 (abunament d'in onn)

Finanzas/budget: CHF 53’000

Referenzas: Bernard Cathomas (directur da Radio e Televisiun Rumantscha), Clà Riatsch (professer da lingua e litteratura rumantscha a l’universitad da Turitg)